Монголын Уран Зургийн Галерей » Уран зургийн галерей

Мэндчилгээ

gallery — Tue, 11 Jan 2011 05:03:07 +0000

Эрхэм хүндэт Та бүхэнд энэ өдрийн мэндийг айлтгахын ялдамд олон улсын музейн баярын мэндийг дэвшүүлье.

Өнгөрөгч 2010 онд галерей амжилт бүтээлээр дүүрэн жил боллоо. Монгол улсад анх удаа Азийн урлагийн 25 дахь удаагийн олон улсын үзэсгэлэнг амжилттай зохион байгуулж үзэгч олондоо өнөөгийн азийн орчин үеийн урлагийн хөгжлийн чиг хандлагыг харуулсан юм.

Нидерландын Вант улсын Принц Клаусын Сан, Америкийн элчин сайдын Соёлын хадгалалт хамгаалалтыг дэмжих сан, “Энержи ресурс” ХХК, “Монгол рояал экспедишн” ХХК зэрэг урлагт элэгтэй байгууллагуудаас хандив тусламжийг авч сан хөмрөгийн хадгалалт хамгаалалтыг сайжруулах, сэргээн засварлах, азийн олон улсын үзэсгэлэнг зохион байгууллаа.

Мөн БНХАУлсын НАНЖИН хотноо “Азийн урлагийн музейн захирлуудын 5 дахь удаагийн дээд хэмжээний уулзалт”-нд оролцож гадаад харилцаагаа өргөжүүлэх азийн бусад музей галерейтай хамтран ажиллах эхлэлийг тавьлаа.

Энэ онд өөрийн болон гэрээт үзэсгэлэнгүүд 39, гадаад дотоодын ойн үзэсгэлэн 8, цахим хуудасны хүндэт зочид 33469 болон өсөж, үзмэрийн хадгалалт хамгаалалт орчин үеийн тоног төхөөрөмжөөр шинэчлэн сайжруулж, гадаадын хөрөнгө оруулалттай төсөл 2, урлагийн боловсролын төвийн сургалт хөтөлбөр 41, гадаадын музей галерей, уран бүтээлчдийн холбоо 30, үзэгчдийн тоо 4516 болон нэмэгдэж орлогын биелэлт 114.6 хувь болон өссөн байна.

Уран зургийн сэргээн засварлах ажил эрчимтэй явагдаж 200 гаруй бүтээлүүдийг цэвэрлэж сэргээн засварлаад байгаа бөгөөд 2011 онд Галерейн 20 жилийн ой тохиож байна.

20 жилийн ойн арга хэмжээний хүрээнд Галерейн түүхэн гэрэл зургийн үзэсгэлэн, залуу уран бүтээлчдийн уралдаант үзэсгэлэн, ардын урлагийн их наадмын гар урлалын үзэсгэлэн, азийн 26 дахь удаагын олон улсын үзэсгэлэн, урлагийн боловсролын сургалт хөтөлбөрийн тайлан үзэсгэлэн, оны шилдэг бүтээл шалгаруулах үзэсгэлэн зэрэг сан хөмрөгийн сэдэвчилсэн үзэсгэлэнгүүдийг зохион байгуулахаар ажиллаж байна.

Биднийг дэмжиж хамтран ажилласан бүх албан байгууллага хамт олон, уран бүтээлчид, үзэгч та бүхэнд чин сэтгэлээсээ талархал илэрхийлье.

Урлагийн тэнгэр ивээх болтугай

Монголын Уран Зургийн Галерейн захирал,
МУЭ-ийн шагналт зураач

А.Чадраабал

2010 ОНЫ ШИЛДЭГ БҮТЭЭЛҮҮД

gallery — Wed, 01 Dec 2010 07:11:30 +0000

Энэ жилийн үзэсгэлэнд болзлын дагуу ирсэн шилдгийн шилдэг уран зураг, уран баримал, монгол зураг, уран дархан, сийлбэр зэрэг дүрслэх урлагийн бүхий л төрлөөр туурвисан 80 уран бүтээлчийн 170 гаруй бүтээлүүдээс 13 уран бүтээлчийн 13 уран бүтээлийг 2010 оны шилдэг бүтээлээр шалгаруулж улсын сан хөмрөгт худалдаж авлаа. Үүнд:

ТАНИЛЦУУЛГА

admin — Fri, 13 Nov 2009 07:40:53 +0000

Монголын Үндэсний Орчин үеийн Уран Зургийн Галерей нь Монголын орчин үеийн дүрслэх урлагийн бүтээлүүдтэй олон түмнийг танилцуулах зорилгоор 1991 онд Дүрслэх Урлагийн Музейгээс салж бие даан үйл ажиллагаагаа явуулж эхэлсэн. Галерей нь 1921 оны Ардын Хувьсгал ялснаас хойш өнөө үе хүртэл бүтээгдсэн дүрслэх урлагийн шилдэг бүтээлүүдийг сонгон цуглуулж, сан хөмрөгөө баяжуулах, судлан сурталчилах, хадгалж хамгаалах, нийгэм, түүх, соёлын хөгжлийн зүй тогтлыг баримтжуулах, дүрслэх урлагаар дамжуулан үзэгчдэд гоо зүйн болон урлагийн боловсрол олгох зорилго, чиглэлтэй төрийн үйлчилгээний байгууллага юм.
Манай алтан сан хөмрөгт монгол зураг, уран зураг, зураасан зураг, баримал, сийлбэр, хөөмөл, ардын гар урлал, хатгамал зэрэг Монголын орчин үеийн дүрслэх урлагийн шилдэг бүтээлүүд хадгалагдаж байна. Энэхүү бүтээлүүдээс та бүхэн нүүдэлчин монголчуудын өнө эртний түүх, соёл, үндэсний ёс заншил, ахуй амьдрал, аж байдал түүнчлэн уудам хээр тал, говь хангайн үзэсгэлэнт байгалийн сонин дүр дүрслэлийг тусгасан уран бүтээлүүд болон чөлөөт сэтгэлгээний орчин үеийн шинэ бүтээлүүдийг тольдон соёрхох боломжтой юм.
Түүнчлэн, гадаадын мэргэжил нэгт байгууллага, хувь хүмүүстэй байнгын харилцаатай ажиллаж, харилцан туршлага солилцох, төсөл хэрэгжүүлэх, ерөнхий боловсролын сургуулиудын сурагчид болон мэргэжлийн их дээд сургуулиудын багш, сурагчидтай хамтран дэлхийн урлагийн болон монголын орчин үеийн дүрслэх урлагийн талаар үзэсгэлэн гаргах, хамтарсан сургалт, семинар явуулах, санал бодлоо солилцох зэрэг олон талт ажлыг зохион байгуулдаг. Сүүлийн жилүүдэд гадаад харилцаагаа улам өргөжүүлэн ажиллаж байгаа бөгөөд Юнеско, ICOM /олон улсын музейн зөвлөл/, Азийн урчуудын хороо, Монгол улсад суугаа гадаад орны Элчин сайдын яамдууд, Японы Фукоука хотын Азийн урлагийн музей зэрэг байгууллагуудтай хамтын ажиллагаатай явж ирлээ.
Үзэгч та манай Галерейд морилон саатаж, монголын дүрслэх урлагийг дэмжин, бидэнтэй хамтран ажиллахыг урьж байна.

Та бүхнийг урлагийн тэнгэр ивээх болтугай.

Ажиллах цагийн хуваарь:
Өдөр бүр 10:00 – 17:00 цаг
1-р сарын 1,
11 сарын 26,
7 сарын 11-нээс 13-ны өдрүүдээс бусад бүх өдөр нээлттэй.

Тасалбар:
Том хүн – 2.000₮
Оюутан – 1.000₮
Хүүхэд – 500₮

2009/12
538 2009/11
351 2009/10
251 2009/09
3 2009/08

2009 ОНЫ ШИЛДЭГ БҮТЭЭЛҮҮД

gallery — Sun, 05 Jul 2009 13:23:15 +0000

Монголын Уран Зургийн Галерейн сан хөмрөгт Монголын орчин үеийн дүрслэх урлагийн шилдэг бүтээлийг худалдан авах зорилготой үзэсгэлэнг жил бүр уламжлал болгон зохион байгуулахаар болж байгаа бөгөөд энэ жилийн үзэсгэлэнг 2009 оны 12-р сарын 04-нөөс 2009 оны 12-р сарын 30-ны хооронд тус галерейн үзэсгэлэнгийн танхимд зохион байгууллаа.

Монгол зураг, уран зураг, барьмал, сийлбэр, цутгамалын төрлөөр нийт 90 гаруй уран бүтээлчийн 130-аад бүтээл шилдэг бүтээл шалгаруулах үзэсгэлэнд оролцлоо. Үзэсгэлэнд тавигдсан бүтээлүүдээс үзмэр худалдан авах улсын комисс сонгон шалгаруулж доорх 14 бүтээлийг авлаа.

Монголын Уран Зургийн Галерей
Холбогдох утас: 327177

Уран Зургийн Галерейн ажилчдын уран бүтээл

gallery — Mon, 15 Jun 2009 01:59:31 +0000

Энэ булангаараа галерейд ажилдаг мэргэжлийн уран бүтээлч ажилтангуудын сүүлийн үеийн уран бүтээлүүдээс танилцуулаж байна.

Галерейд нийт 13 ажилтан ажилладаг бөгөөд тэдгээрээс 4 хүн уран бүтээл туурвиж байна.

Та зурган дээр дарж, дэлгэрэнгүй намтар, уран бүтээлтэй танилцаж болно.

Захирал А.ЧАДРААБАЛ	Сан хөмрөгч О.ДОРЖГОТОВ	Сан хөмрөгч Ж.БАТ-УНДАР	Үзмэр харагч Н.БААСАНДОРЖ

ХАРИЛЦАХ ХАЯГ

gallery — Mon, 04 May 2009 05:21:39 +0000

Монголын уран Зургийн Галерей
Соёлын Төв Өргөө “Б” корпус
Сүхбаатарын талбай
Сүхбаатар дүүрэг, Улаанбаатар хот

Утас: 11-327177
Факс: 11-331687,

Шуудангийн хаяг:
Монголын уран Зургийн Галерей
Улаанбаатар 11 Ш/х-20

Цахим хуудас: www.art-gallery.mn

Э-шуудан: info@art-gallery.mn

Захирал: А.Чадраабал director@art-gallery.mn
Менежер: Г.Ялалт yalalt@art-gallery.mn
Сан хөмрөгч: О.Доржготов dorjoomr@art-gallery.mn
Сан хөмрөгч: Ж.Бат-Ундар bat-undar@art-gallery.mn
Бүртгэл мэдээллийн санч: М.Мөнхбаясгалан munkhbayasgalan@art-gallery.mn
Урлагын Боловсролын Төвийн мэргэжилтэн: Д.Оюунцэцэг oyuka_0609@yahoo.com