Монгол зураг

Монголын Уран Зургийн Галерейн сан хөмрөгийн 40 гаруй хувийг зураасан зургийн бүтээлүүд эзлэх агаад тус сан хөмрөгт хадгалагдаж буй бүтээлүүд нь төрөл зүйл, агуулга, бүтээгдсэн оны хувьд доорхи байдлаар ангиллагддаг. Үүнд: Монгол зураг, хулдаасан, модон, төмөр барын бүтээлүүд, зурагт хуудас, харандаан болон усан будгийн таталбар, этюд, судалбар зургууд болно. Энэхүү цахим хуудсанд орж буй зураасан зургийн шилмэл бүтээлүүд нь цаг хугацааны хувьд 1923 оноос 2010 оны хооронд бүтээгдсэн манай орчин цагийн дүрслэх урлагийн ахмад, дунд, залуу гэсэн үе үеийнхний уран бүтээлчдийн ахин давтагдашгүй, хосгүй үнэт бүтээлүүд билээ.
Тухайлан дурдахад 1923 онд бүтээгдсэн Марзан хэмээх Балдуугийн Шаравын бүтээсэн “Лениний хөрөг” бүтээл нь дэлхийн ажилчин, тариачин ард түмний их багшийн Монголд төдийгүй Ази тивд бүтээгдсэн анхны томоохон хэмжээний хөрөг зургийн тоонд зүй ёсоор ордог билээ.
1950-иад оны сүүлчээс эхлэн манай зураач, урчууд үндэсний уламжлалт дүрслэх урлагаа сэргээн хөгжүүлж эхэлсэн бөгөөд чингэхдээ зохиомж, хэллэгийн хувьд өрнөдийн урлагийн сургуультай хосолсон шинэлэг хэлбэрийг бий болгосон байдаг. Тухайлан дурьдвал Төрийн шагналт, ардын зураач Үржингийн Ядамсүрэнгийн 1958 онд бүтээгдсэн “Өвгөн хуурч” бүтээл нь Монгол зургийн уламжлалт арга барилыг орчин үеийн дүрслэх урлагтай уялдуулж бүтээсэн оргил бүтээлүүдийн нэг юм. Түүнчлэн ардын зураач А.Сэнгэцохиогийн “Ленинд бараалхсан нь”, “Хар буур”, “Нөхөрлөл”, “Зураач Марзан Шарав”, Урлагийн Гавъяат Зүтгэлтэн зураач Ц.Даваахүүгийн ”Сүргийн мэнд”, зураач Ё.Жигжиддуламын “Шагайн тойром”, Ц.Минжүүрийн “Нүүдэл” зэрэг олон арван бүтээлүүдээр шинэ цагийн монгол зургийн өнгө аяз, төрх байдлыг илэрхийлж болно.